فەرمانگەی پەیوەندییەكانی دەرەوەی حكومەتی هەرێم رایدەگەیەنێت، لە ئاكامی گرژییەكانی ناوچەكە، ئاسمانی عێراق داخرا و گەشتەكانی چوون و هاتن لە سەرجەم فڕۆكەخانەكان ڕاگیران. ئەمەش گرفتێكی زۆری بۆ هاوڵاتییانی هەرێمی كوردستان لە فڕۆكەخانەكانی ئیستانبوڵ دروستكرد كە بەشێوەی ترانزێت دەیانویست بگەڕێنەوە هەرێمی كوردستان.
دەشڵێت، “ژمارەیەك لە حاجییان كە فەریزەی حەجیان كردووە لە رێگای گەڕانەوەیان لە فڕۆكەخانەی عەممان گیریانخواردووە”.
ئەوەشخراوەتەڕوو، حكومەتی هەرێم لە سۆنگەی پەرۆشی بۆ گەڕاندنەوەی هاوڵاتییانی خۆی، لە رێگای پێكهێنانی لێژنەیەك لە فەرمانگەی پەیوەندییەكانی دەرەوەی حكومەت و وەزارەتی ناوخۆی حكومەتی هەرێم، لەگەڵ هاوڵاتییان و لایەنە رەسمییەكانی ئەو وڵاتانەی هاوڵاتییان تێیدا گیریانخواردووە لە پەیوەندیدایە بەمەبەستی جێبەجێكردنی رێكارەكان، تاوەكو بتوانین بەزووترین كات هاوڵاتییانمان بگەڕێنینەوە هەرێمی كوردستان.
