کۆمیسیۆنی هەڵبژاردنەکانی عێراق رایدەگەیەنێت، بۆ رۆژی دەنگدان پێویستیان بە نزیکەی 250 هەزار کارمەندی سەر سندوقەکان هەیە.
کۆمسیۆنی باڵای هەڵبژاردنەکانی عێراق لە راگەیەندراوێکدا کە وێنەیەکی دەست تۆڕی میدیایی ئێستا کەوتووە، رایگەیاند، وەکو ئامادەکارییەک بۆ ئەنجامدانی هەڵبژاردنی ئەنجومەنی نوێنەرانی عێراق بەپێی ستانداردە نێودەوڵەتییەکان، کۆمسیۆنی هەڵبژاردنەکان بۆ ماوەی یەک رۆژ پێویستی بە نزیکەی 250 هەزار کارمەندی سەر سندوقەکانی دەنگدان هەیە، جا چ فەرمانبەر بێت، یان دەرچوو و خوێندکاری زانکۆ.
ئاماژەی بەوەشکرد، تا رۆژی دووشەممە، ژمارەی داواکاران گەیشتووەتە 187 هەزار و 861 کەس.
کۆمسیۆن دەشڵێت، عەلی ساڵح جەعفەر، سەرۆکی لیژنەی هەڵبژاردنەکان پەیوەندیی بە نووسینگەی سەرۆکی حکومەتی عێراقەوە کردووە بۆ وەرگرتنی رەزامەندی، بەمەبەستی دەرکردنی سوپاسنامە بۆ ئەو فەرمانبەرانەی کە لە رۆژی هەڵبژاردندا، دەبنە کارمەندی سەر سندوقەکانی دەنگدان.
بە بڕیاری ئەنجومەنی وەزیرانی عێراق، رۆژی 2025/11/11، هەڵبژاردنی ئەنجومەنی نوێنەرانی عێراق بەڕێوەدەچێت.
