سەرۆک وەزیرانی پێشووی عێراق رایدەگەیەنێت، زۆرینەی سەرکردە سیاسییەکانی عێراق سیستمی سەرۆکایەتییان دەوێت، پێویستە سیستمەکە بگۆڕێت و کۆنفیدراڵیش بە کورد بدرێت.
مستەفا کازمی، سەرۆک وەزیرانی پێشووی عێراق لە نوێترین چاوپێکەوتنی تەلەفزیۆنیدا رایگەیاند، سیستمی پەرلەمانی زیانی زۆری بە عێراق گەیاندووە، زۆرێک لە سەرکردەکان سیستمی سەرۆکایەتی بۆ عێراق بە گونجاو دادەنێن، بەڵام ئەوەی لێرەدا زەرەرمەند دەبێت کوردەکانن.
ئاماژەی بەوەشکرد، لە ئەگەری گۆڕینی سیستمی عێراق بۆ سەرۆکایەتی پێویستە لەگەڵ کورد رێکبکەوین، ئازادیان پێبدەین پێیان بڵێین، ئێوە لە ناوچەکانی خۆتان ئازادن، تەنها لە دوو مەسەلەدا هاوبەشین ئەوانیش سیاسەتی دەرەوە و بەرگریی لە وڵات، ئەمەش دەبێتە نمونەیەکی سەرکەوتوو و لە چەند وڵاتێكی وەک بەریتانیا و سکۆتلەندا ئەزموون کراوە.
کازمى جەختیشیکردەوە، بە جێبەجێکردنی کۆنفیدراڵی، هەرێم لە کێشەی مووچە و کۆمەڵێك کێشەی دیکە رزگارى دەبێت.
