ئاسایشی گەرمیان ئاشكرایدەكات، سەرۆکایەتیی دادگای تاوانەکانی کەرکوک/ گەرمیان دوو كەسی بە تۆمەتی “تیرۆر و ساختەكاری” سزاداوە.
لە ڕاگەیەندراوێكدا ئەمڕۆ سێشەممە 26ی كانونی دووەم، ئاسایشی گەرمیان ڕایگەیاندووە، “لە چەند مانگی ڕابردوودا توانرا لەلایەن هێزەکانی بەڕێوبەرایەتیی ئاسایشی گەرمیانەوە بە تۆمەتی تیرۆر و ساختەکردن دوو تۆمەتبار دەستگیر بکرێن”.
ئاسایشی گەرمیان ئاماژەی بەوەشكردووە، “پاش ئەوەی دۆسییەی ئەو دوو كەسە خرایە بەردەم دادەوەری لیکۆڵینەوە و هەروەها پاش چەندین دانیشتنی دادگا و خستنەڕووی تەواوی بەڵگەکان و دانپیادانانی تاوانباران بە تاوانەکانیاندا کە لە خوارەوە ئاماژەیان پێ دراوە، سەرئەنجام لەلایەن سەرۆکایەتیی دادگای تاوانەکانی کەرکوک/ گەرمیانەوە سزا دران”.
سەبارەت بە جۆری سزاكان ئاسایشی گەرمیان ئاشكرایكردووە، “تاوانبار (ع.م.م.ا) لەدایکبووی (1976)ە و دانیشتووی گوندی (شەفیق ئاغا)ی قەزای خانەقینە لە بەرواری 22/5/2019 بە تۆمەتی ئەنجامدانی کردەوەی تیرۆریستی و تێکدانی ماڵی کوردەکانی ناحییەی گوڵاڵە لە سنووری قەزای خانەقین دەستگیرکراوە و لە بەرواری 20/1/2021 بە پێی مادەی (3)ی تیرۆر بڕگەی (7) بە شەش ساڵ زیندانی سزادراوە”.
ئەوەش خراوەتەڕوو، “تاوانباری دووەم ناوی (ع.ا.ف.ح) لەدایکبووی (1986)ە و دانیشتووی ناوچەی (ئەبو سەیدە/ شارەبان)ە، لە بەرواری 10/11/2020 بە تۆمەتی ساختەکردنی ڕێگەپێدانی زاڵگە لە سنووری ناحییەی قۆرەتوو دەستگیرکرا، لە بەرواری 11/1/2021 بەپێی مادەكانی (289و298) و (292و298) لە یاسای سزادانی عێراق بە حەوت مانگ زیندانی سزا درا”.
دواتر بۆ بەرسەربردنی ماوەی سزاکانیان “دوو تاوانباری ناوبراو ڕەوانەی بەرێوبەرایەتیی چاکسازیی گەورانی سلێمانی کران”، وەك ئاسایشی گەرمیان ڕاگەیاندووە.
