بڕیاربوو ئەمڕۆ لە بەردەم دادگاى دهۆک گردبوونەوەیەک بۆ پشتیوانى لە ئومێد بەرۆشکى ئەنجامبدرێت، بەڵام رێگرى لێکراوە.
بڕیاربوو كاتژمێر 11ى پێش نیوەڕۆى ئەمڕۆ لەلایەن کەسوکار و بەشێک لە چالاکوان و رۆژنامەنووسانى دهۆکەوە گردبوونەوەیەك بۆ ناڕەزایەتی لە بڕیاری دادگا و داواى ئازادبوونی (ئومێد بەرۆشكی) لە بەردەم دادگای دهۆك ئەنجام بدرێت، بەڵام لەلایەن هێزێكی ئەمنییەوە رێگری لە چالاکییەکە كرا.
سەنتەری میترۆ بۆ داکۆکى لە مافى رۆژنامەنووسان لە راگەیەندراوێکدا ئیدانەی رێگریكردن لەو چالاكییە دەكات و بە هەڕەشە بۆ سەر پرەنسیپەكانی یاسای ئازادیی رادەربرین و یاسای خۆپیشاندان ناویدەبات.
میترۆ داواش لە لایەنە پەیوەندیدارەكان دەكات كە دووبارە بە كەیسی رۆژنامەنوسەكەدا بچنەوە و زەمینە بڕەخسێنن بۆ پرۆسەی دادگایكردنێكی دادپەروەرانە.
لە 30ى كانونی دووەمی 2025، ئومێد بەرۆشكی لەسەر كەیسێكی رۆژنامەنوسی بە شەش مانگ زیندانی سزادرا، پارێزەرانی ئەو رۆژنامەنووسە دەستگیرکراوەى بادینان تانەیان لە بریارەكەدا و پێیانوابوو كە كەیسەكەی بە سیاسی كراوە.
