رۆژی 3ی ئایاری هەموو ساڵێک لەلایەن رێکخراوی نەتەوە یەکگرتووەکانەوە بە رۆژی جیهانیی ئازادیی رۆژنامەگەری دیاریکراوە.
ئێستا گەشەی خێرا و بەکارهێنانی زیرەکیی دەستکرد خەریکە بە شێوەیەکی بەرچاو ئازادیی رۆژنامەگەری و میدیا بەشیوەیەکی گشتی دەگۆڕێت.
ئەمساڵ رۆژی جیهانیی ئازادیی رۆژنامەگەری تیشک دەخاتە سەر کاریگەرییەکانی زیرەکیی دەستکرد لەسەر ئازادیی رۆژنامەگەری، سەربەخۆیی میدیا، و ئامانجی جیهانیی دڵنیابوون لە دەستڕاگەیشتن بە زانیاری و پاراستنی ئازادییە بنەڕەتییەکان و گەشەپێدانی بەردەوام لەو بوارانەدا.
لە کاتێکدا بنەماکانی میدیای ئازاد و سەربەخۆ و فرەیی بە گرنگ ماونەتەوە، کاریگەرییەکانی زیرەکیی دەستکرد لەسەر کۆکردنەوە و پرۆسێسکردن و بڵاوکردنەوەی زانیاری، هەم دەرفەتی داهێنەرانە و هەم تەحەدای جددی دروستدەکات.
زیرەکیی دەستکرد دەتوانێت پشتگیریی ئازادیی رادەربڕین بکات لەڕێگەی ئاسانکاری دەستڕاگەیشتن بە زانیاری، رێگەدان بە کەسانی زیاتر بۆ پەیوەندیکردن لە سەرانسەری جیهاندا، و گۆڕینی چۆنیەتی ئاڵوگۆڕی زانیارییەکان لە ئاستی جیهانیدا.
لە هەمان کاتدا زیرەکیی دەستکرد مەترسیی نوێ لەگەڵ خۆیدا دەهێنێت، بەوپێیەی دەتوانرێت بۆ بڵاوکردنەوەی زانیاریی ناڕاست یان چەواشەکارانە و بڵاوکردنەوەی قسەی رقاوی لەڕێگەی ئۆنلاینەوە و پشتگیریکردنی فۆڕمی نوێی سانسۆر بەکاربهێندرێت.
ئێستا زیرەکیی دەستکرد دەتوانرێت بەکاربهێنرێت بۆ دروستکردنی ناوەڕۆکی ساختە ئەوەش رۆڵی هەیە لەوەی متمانەکردن بە سیستمی دیموکراسی تێکبدات، چارەسەرکردنی ئەم تەحەددایانە پێویستی بە هاوکاریی نێوان حکومەتەکان، میدیاکان و کۆمەڵگەی مەدەنی هەیە.
پەیماننامەی دیجیتاڵیی جیهانی نەتەوە یەکگرتووەکان جەخت لەسەر گرنگیی چارەسەرکردنی کێشەکانی تەکنەلۆژیا دەکاتەوە لە هەمان کاتدا پاراستنی نهێنیی تاک و ئازادیی رادەربڕین.
لە هەرێمی کوردستانیش لەمڕۆژەدا رۆژنامەنووسان و کەسانی تایبەتمەند بە میدیا و چالاکوانان چالاکیی جۆراوجۆر ئەنجامدەدەن، هەمووان داوای میدیای سەربەخۆ و ئازاد دوور لە مللانێی حزبی و سیاسی دەکەن.
