لە توێژینەوەیەکی نوێدا دەرکەوتووە، 15 خولەک خەوی زیادە، توانای مێشکی هەرزەکاران بۆ بیرکردنەوە و وەبیرهاتنەوە، باشتر دەکات.
لە توێژینەوەیەکی نوێی هاوبەشی نێوان توێژەرانی ئەمریکی و چینی ئەوە ئاشکراکراوە، 15 خولەک خەوی زیادە بۆ هەرزەکاران، پەیوەندییەکی بەرچاوی ئەرێنیی بە تەندروستیی مێشکیانەوە هەیە.
توێژەران تاقیکردنەوەیەکیان لەسەر سێ هەزار و 222 هەرزەکار، کە تەمەنیان لەنێوان 9 بۆ 14 ساڵ بوو، ئەنجامدا و سەرجەمیان بەسەر سێ گروپدا دابەشکرد؛ یەکەم، ئەوانەی بە تێکڕا (7 کاتژمێر و 10 خولەک) لە شەوێکدا دەخەون، ئەوانەی (7 کاتژمێر و 25 خولەک) و ئەوانەی لە نێوان (7 کاتژمێر و 21 خولەک) دەخەون.
توێژینەوەکە دەریخستووە، ئەوانەی کە زیاتر دەخەون، نمرەکانیان لە تاقیکردنەوەکانی تایبەت بە خوێندنەوە، چارەسەرکردنی کێشەکان (وەک بیرکاری) و تەرکیزکردندا، بە شێوەیەکی بەرچاو باشتر بووە، بە بەراورد بەوانەی کەمتر دەخەون.
