پوختەی قسەکانی بافڵ جەلال تاڵەبانی لە دووەمین دیداری یەکێتی

بافڵ جەلال تاڵەبانی، سەرۆکی یەکێتیی نیشتمانیی کوردستان لە دووەمین دیداری یەکێتیدا قسەیکرد و پوختەی قسەکانی ئەمانەی خوارەوەن:

– یەکێتیی نیشتمانیی کوردستان بەوە بەناوبانگە بۆچوونی جیاوازی تێدایە و دەتوانین سوود لەو بۆچوونانە ببینین.

– دیداری یەکێتی بۆ کۆکردنەوەیە نەک جیاکردنەوە، بۆیە کە باسی گۆڕانکاری و گەنجبوونەوە دەکرێت، هیچیان زیان بە کادرەکان ناگەیەنن.

– چەند حزبێک هەیە کە لە سەرەوە بڕیاردەدرێت، لەوانەیە کادرەکانی بەدڵیان نەبێت.

– لە هەڵبژاردنەکان سەرکەوتوو بووین و دەنگمان زیادیکرد، بەڵام من بە ئەنجامەکان رازی نیم و دەبێت هەنگاو بە هەنگاو بەرەوپێشتر بچین.

– لە دهۆک حزبێکی کوردستان زیاتر لە سەددام حسێن دەنگی هێنا، نەتەوە یەکگرتووەکان شایەتی ئەوەن.

– رێبازی مام جەلال پیرۆزە، ئێمە دەبێت هەوڵبدەین بەرنامەکەی جێبەجێبکەین، ئەم دۆخی ئابوری و ئەمنییەی ئێستا رێباز و بەرنامەکەی مام جەلال نییە.

– ئەگەر بەرنامەکەی مام جەلال جێبەجێبکەین، ئەو کوردستانەمان دەبێت کە هەزاران ساڵە هیوامان پێی خواستووە.

– نەمانتوانیوە وەک پێویست ماددەی 140 جێبەجێبکەین، بەڵام رۆژانە تیمەکەمان خەباتی بۆ دەکەن.

– یەکێک لە گرنگترین پرۆژەکانی یەکێتی هێنانی گەنجە بۆ ناو حزبەکە، گەنجی ئێستا زۆر زیرەکن.

– بەرنامەی یەکێتی ئەوە نییە یەکێک شوێنی یەکێکی دیکە بگرێت، بەڵکو بەرنامەمان ئەوەیە بەیەکەوە وەک تیم ئیشبکەین.

– یەکێتی لە گۆڕانکاری ناترسێت و هیچ شتێکمان وەک حزبەکانی دیکە نییە، حزبی تر هەیە ئێستاش بانگەشەی هەڵبژاردنیان وەک ساڵی 1991ـە.

– کەس پێشبینیی ئەوەی نەدەکرد لە هەڵبژاردنی ئەنجومەنی پارێزگاکان یەکێتی لە هەموو حزبەکان بباتەوە، بەڵام ئێمە پێشبینیی ئەوەمان دەکرد.

– لە سلێمانی هەر شتێک روودەدات، سەرەڕای ئەو هەموو حزب و رێکخراوە، دێن لە دەرگای یەکێتی دەدەن.

– ئەوە یەکێتییە لە بەغداد قسەی دەیخوات، حکومەت وەفد لەدوای وەفد دەنێرێت ناتوانن پێشبکەون، کاک قوباد بەتەنها دەچێتە بەغداد دوور لە راگەیاندن، دێتەوە مووچە دەنێردرێت.

– هەڵبژاردنی ئەنجومەنی نوێنەرانی عێراق، هەڵبژاردنی ئێمەیە.

– من ئەمڕۆ لە کاتی هەڵبژاردن توندترم بەرامبەر پارتی و یەکێتی کەمێکیش تەنازول ناکات بۆ مافەکانی خۆی و کوردستان.

– گفتوگۆ لەگەڵ بەرامبەر و دوژمن دەکرێت، نەک لەگەڵ هاوڕێ.

– لە هەڵمەتی هەڵبژاردن زۆر توند قسەم کرد، بەڵام هەرگیز وەک ئەوان نەمانگەیاندە جوێندان.

– ئامادەم 20 جاری دیکەش بچمە هەولێر و لەگەڵ کاک مەسرور دابنیشم، تا حکومەتێک پێکبهێنین کە بتوانین وەک پێویست خزمەتی میللەتەکەمان بکەین.

– گفتوگۆکانی ئێمە و پارتی لەسەر پرەنسیپی حکومڕانی بووە.

– ئەگەر رێککەوتنێک نەبێت لەسەر پرەنسیپە سەرەکییەکانی حکومڕانی، هیچ گرنگییەکی نییە چەند وەزیرت هەبێت.

– ئەگەر نەمانتوانی وەک پێویست خزمەتی میللەتەکەمان بکەین و چەند لایەنێک نەتوانێت بیروبۆچوونی خۆی دەرببڕێت، بژاردەی زۆرمان هەیە و لە هیچ بژاردەیەک ناترسین کە بۆ میللەت و حزبەکەمان باشبێت.

– لە کوردستان تەنیا یەکێتیی نیشتمانیی کوردستان کوردایەتی دەکات و دەستی لە خوێنی هیچ کوردێکدا نییە و هەرگیزیش نایبێت.

– چەند برادەرێک کە لەناو یەکێتی بوون و ئێستا دوورن لەم حزبە، بە خیانەت کەرکوکیان فرۆشت.

– هیچ حزبێک نییە وەک ئێمە پەیوەندییە نێودەوڵەتییەکانی باشبێت، تاکە حزبین لە دونیا سەرۆکی حزبەکە رووبەڕوو لەگەڵ لاڤرۆڤ دابنیشێت.

– لەگەڵ ترەمپ کەمێک لە یەکتر دەچین.

– حکومەتی ئێستای ئەمریکا لە بڕیاردان ناترسێت، بۆیە دەتوانین دۆخی خۆمانیان تێبگەیەنین، ئەمە هەلێکی باشە بۆ ئێمە.

– ئەمڕۆ دۆخی یەکێتیی نیشتمانیی کوردستان زۆر باشە و ساڵ بە ساڵ باشتریش دەبێت.

– یەکێتی ژنی بەهێز، بڕیاردەر و شەڕکەری هەبووە و هێندەی پێویستیمان بۆ گەنج، پێویستمان بە ژنیش هەیە.

– دەبێت کەشێک دروستبکەین، خەڵک کە ویستی بازرگانی بکات بێتە سلێمانی.

– هیچ شوێنێک نییە وەک کوردستان و بەتایبەت سلێمانی کە زیاد لە ٪95ـی تاوانەکان بدۆزرێتەوە و رێوشوێن بگیرێتەبەر.

– دادگا دەبێت سەربەخۆ بێت، ئەوەی کە لە هەندێک پارچەی کوردستان روودەدات خەڵک شەرمی لێدەکەن.

– حزب نییە لە دونیادا بەقەد یەکێتی خزمەتی خەڵکی کردبێت.

– ئێمە لە داعش، چەکی سەدام و بۆمببارانکردن ناترسین، ئێستا لە دوو قسەی ئەو کەسانە دەترسین کە لە یەکێتیدا نەماون؟

– با لەم هەڵبژاردنە هەموو نەیارەکانمان بدەین بە زەویدا.