وتەبێژی بازاڕی دراوی شاری سلێمانی هۆکاری دابەزینی بەهای دۆلاری لە بەرامبەر دیناری عێراقیدا ئاشکراکرد.
جەبار گۆران، وتەبێژی بازاڕی دراوی شاری سلێمانی لە لێدوانێکیدا بۆ تۆڕی میدیایی ئێستا رایگەیاند، هۆکاری سەرەکی دابەزینی بەهای دۆلار بەرامبەر دیناری عێراقی، لە چەند رۆژی رابردوودا، بۆ چەند هۆکارێک دەگەڕێتەوە، لەوانە: عمولەی حەواڵەکردن لەلایەن کۆمپانیا بچووکەکانەوە زیادیکردووە، ئەمەش راستەوخۆ بووەتە هۆی بەهێزبوونی دیناری عێراقی لەبەرامبەر دۆلاردا.
وتیشی، “رێکارەکانی بانکی ناوەندیی عێراق کاریگەریی لەسەر دابەزینی بەهای دۆلار هەبووە، چونکە ئاستی مامەڵەکانی ئاسانتر و خێراترکردووە و کەمتر مامەڵەکان دەگەڕێنەوە بۆ بازاڕەکانی ئاڵوگۆڕی دراو”.
ئاماژەی بەوەشدا، پەیوەندییەکانی نێوان ئەمریکا و ئێران و هەوڵەکانیان بۆ دانوستان و لێکتێگەیشتن، کاریگەریی لەسەر دابەزینی دۆلار دروستکردووە، چونکە رێگاکانی مامەڵەکردن لە ئێران ئاساییدەکاتەوە.
