ئاراس جەبار، شارەزای كەشناسی رایدەگەیەنێت، پێشبینیدەكرێت لە چەند رۆژی داهاتوودا پلەكانی گەرما بەرزببنەوە و تاوەباران و هەورە بروسكە چەند ناوچەیەكی هەرێم بگرێتەوە.
ئاماژەی بۆ ئەوەش كردووە، سەرەتا بای باكووری رۆژهەڵات كە لە رۆژی رابردووەوە لە ناوچەكانی پارێزگای سلێمانی و ئیدارەی راپەڕین چالاكبووە تاوەكو بەرەبەیانی رۆژی یەكشەمە بەردەوامیدەبێت و دواتر بەهۆی كاریگەریی نزمەپاڵەپەستۆی دەریای سوور بۆ سەر ناوچەكانمان لە نیوەڕۆی رۆژی یەكشەممەوە كۆتایی دێت و پلەكانی گەرماش بەرزدەبنەوە.
ئاشكراشیكرد، بۆ رۆژانی دووشەممە و سێشەممە كاریگەریی ئەو نزمەپاڵەپەستۆ گەرمییە زیاتر دەبێت لەسەر ناوچەكانی عێراق بەگشتی و پلەی گەرمی بەرزبوونەوەیەكی زیاتر بەخۆیەوە دەبینێت بە جۆرێك لە سەنتەری پارێزگاكانی عێراق و ناوچەكانی ئیدارەی گەرمیان بەرزترین پلەی گەرمی لە رۆژدا بۆ 35 تا 37 پلەی سەدی بەرزدەبێتەوە و لە سەنتەری پارێزگاكانی هەرێمی كوردستانیش بۆ 28 تا 30 پلە.
ئەوەشی خستووەتەڕوو، لە رۆژانی دووشەممە و سێشەممە بەهۆی كاریگەریی نزمەپاڵەپەستۆی لاوازی دەریای سوور چەند ناوچەیەكی عێراق و هەرێم هەندێك كات كەڵەكە هەور لە ئاسمانی ناوچەكاندا دروستببێت و پێشبینیدەكرێت كە نمەباران ببارێت لەگەڵ روودانی هەورەبروسكە و بەدیاری نەكراویش پێشبینیدەكرێت هەندێك شوێنیش تاوەبارانی باش ببارێت، بەڵام بە گشتی حاڵەتەكە لاوازە و باران لە هەموو شوێنێكدا نابارێت.
