بەریتانیا بەکارهێنانی مۆبایل لە خوێندکارانی خوار 16 ساڵ قەدەغەدەکات، دوای راپرسییەک دەربارەی کاریگەرییەکانی بەکارهێنانی مۆبایل.
رۆژنامەی گاردیان بڵاویکردەوە، لە 90%ی قوتابخانەکانی بەریتانیا لەماوەی داهاتوودا بەکارهێنانی مۆبایل لەلایەن خوێندکارانی خوار 16 ساڵەوە قەدەغەدەکەن و بۆ ئەو مەبەستەش هەنگاوی جدی دەگیرێتەبەر.
ئاماژەی بەوەشدا، بڕیارەکە لەسەر داواکاریی رەچڵ دی سۆرا، سەرۆکی کۆمسیۆنی کاروبارەکانی تایبەت بە منداڵان پێشنیارکراوە، دوای ئەوەی ناوبراو راپرسییەکی لەنێوان قوتابخانەکانی بەریتانیا ئەنجامدا و بەشێكی زۆریان لەبارەی زیانەکانی مۆبایلەوە وەڵامیان دابووەوە.
رۆژنامەکە ئەوەشی خستەڕوو، لە وردەکاری راپرسییەکەدا رێژەی 99.8%ـی قوتابخانە سەرەتاییەکان و رێژەی 90%ـی قوتابخانە دواناوەندییەکان داوای قەدەغەکردنی بەکارهێنانی مۆبایلیان کردووە و بە زیان بۆ تەندروستیی جەستە و کەمکردنەوەی تەرکیز و بیرکردنەوەی خوێندکارەکان ئاماژەیان پێداوە.
دەشڵێت، “لەماوەکانی داهاتوودا پلان بۆ جێبەجێکردنی هەنگاوەکانی قەدەغەکردنەکە جێبەجێدەکرێت و ئەگەری هەیە سەرجەم قوتابخانەکان بگرێتەوە”.
