بۆ بەشداربوون لە کۆڕبەندی ئابوریی دێڵفی، قوباد تاڵەبانی سەردانی یۆنان دەکات.
قوباد تاڵەبانی، جێگری سەرۆکی ئەنجومەنی وەزیران بە یاوەری هەریەک لە وەزیری پلاندانان و جێگری لێپرسراوی فەرمانگەی پەیوەندییەکانی دەرەوە، بەرەو یۆنان بەڕێکەوت بۆ بەشداریکردن لە کۆڕبەندی ساڵانەی ئابوریی دێڵفی، کە ژمارەیەکی زۆر لە سەرۆک و سەرۆک وەزیران و بەرپرسانی باڵا و بیرمەندان و ئەکادیمیستانی جیهان بەشداری تێدا دەکەن بۆ گفتوگۆکردن لەبارەی دوا پێشهاتە سیاسی و سەربازی و ئابورییەکان.
سێیەم ساڵە قوباد تاڵەبانی بەشدارە لەم کۆربەندە نێودەوڵەتییەدا کە چاوەڕێ دەکرێت پلان و ستراتیژی گشتگیر بۆ چارەسەرکردنی قەیرانەکان تاوتوێ بکرێت و نەخشەڕێگای ئایندە دابڕێژرێت لەبەر رۆشنایی گۆڕانکارییە سیاسیەکانی ناوچەکە، وەک ئەوەى لە راگەیەندراوى نووسینگەکەیدا هاتووە.
