گەشتوگوزاری هەڵەبجە رایدەگەیەنێت، “بۆ رۆژانی جەژن نزیکەی 50 هەزار گەشتیار سەردانی شوێنە گەشتیارییەکانی هەڵەبجەیان کردووە”.
هەورامان جەلال، بەڕێوەبەری راگەیاندنی گەشتوگوزاری هەڵەبجە، بە تۆڕی میدیایی ئێستای راگەیاند، “بۆ رۆژانی جەژنی رەمەزان، نزیکەی 50 هەزار گەشتیار هاتوونەتە سنووری هەڵەبجە و سەردانی شوێنە گەشتیارییەکانیان کردووە، کە زۆرینەیان گەشتیاری ناوچەکانی خوارووی عێراق بوون”.
وتیشی، “زۆربەی شوێنەکانی هەڵەبجە گەشتیاریین، لە گەشتوگوزاری هەڵەبجە 36 ناوچەی گەشتیاری تۆمارکراون لەگەڵ کۆمەڵێک شوێنی دیکە کە شوێنەوارین و دەتوانرێت بۆ گەشتیاری سوودی لێببینرێت، بەڵام لەبەرئەوەی لەلایەن بەڕێوەبەرایەتیی شوێنەوارەوە کاری کنە و پشکنین و هەڵکۆڵینیان تەواو نەبووە نەتوانراوە وەک لایەنی گەشتیاری سوودیان لێوەربگیرێت هەوڵدەدرێت لە داهاتوودا ئەوانیش بکرێن بە شوێنی گەشتیاری”.
