روانگەی سوری بۆ مافەکانی مرۆڤ رایگەیاند، هێزەکانی سوریای دیموکرات و حکومەتی نوێی ئەو وڵاتە لەبارەی بەڕێوەبردنی دوو گەڕەکە کوردنشینەکەی حەلەب گەیشتنە رێککەوتن.
ئەمڕۆ سێشەممە، ئیدارەی خۆسەر و حکومەتی نوێی سوریا رێککەوتنێکی سەرەتاییان لەبارەی بەڕێوەبردنی هەریەکە لە گەڕەکەکانی شێخ مەقسود و ئەشرەقیە لە حەلەب، راگەیاند.
بەپێی رێککەوتنەکە، ئەو دوو گەڕەکە کوردنشینە بە ئاسایشی گشتیی حکومەتی نوێی سوریا دەسپێردرێت و وەک روانگەی سوری باسی لێوەکردووە، گەرەنتیی هاتوچۆی دانیشتوانی ئەو دوو گەڕەکە لە ناو شار و دەرەوەی شاردا بە ئازادی و بەبێ هیچ هەراسانکردنێک دەکرێت.
هەر بەپێی رێککەوتنەکە، حکومەتی نوێی سوریا 170 دیلی هەسەدە ئازاددەکات و ژمارەیەک تەرمیشیان رادەستدەکاتەوە، لەبەرامبەردا هەسەدە 400 دیل و تەرمی گروپە چەکدارەکان رادەستدەکاتەوە.
ئەم رێککەوتنە، بەشێکە لە زنجیرەیەک لێکتێگەیشتن بەئامانجی ئاساییکردنەوەی دۆخی ئەمنی و ئیداری لەو ناوچانەی سوریا، کە لە ماوەی رابردوودا، گرژی و ئاڵۆزییەکی زۆریان تێدابوو.
