بریکاری وەزارەتی نەوتی عێراق رایدەگەیەنێت، وەزارەتەکە پلانی هەیە تا ساڵی 2029، ئاستی بەرهەمهێنانی نەوت بۆ زیاتر لە شەش ملیۆن بەرمیل لە رۆژێکدا بەرزبکاتەوە.
باسم محەمەد خوزەیر، بریکاری وەزارەتی نەوتی عێراق لە لێدوانێکدا رایگەیاند، وەزارەتەکە هەوڵدەدات تواناکانی بەرهەمهێنانی نەوت و غاز لە چوارچێوەی پلانێکی پێنج ساڵەی دیاریکراودا زیادبکات و ئامانجیەتی، لە نێوان ساڵانی 2028 بۆ 2029، لە رۆژێکدا زیاتر لە شەش ملیۆن بەرمیل نەوت بەرهەمبهێنێت.
وتیشی، وەزارەت کاردەکات بۆ بەدیهێنانی ئەم ئامانجانە لە ڕێگەی ئەو پرۆژانەی کە هەموو پارێزگاکان دەگرێتەوە و سوود لە چالاکیی گەڕان و پشکنینی کۆمپانیاکانی بەرهەمهێنانی نەوت وەردەگرێت.
ئاماژەی بەوەشکرد، یەکێک لە دیارترین پرۆژەکانی ئێستا لە کەرتی دەرهێناندا، پرۆژەی پەرەپێدانی غازی یەکخراوەیە لە کێڵگەی ئەرتاوی لە باشوری عێراق، هەروەها پرۆژەی پەرەپێدانی چوار کێڵگەی گرنگ لە کەرکوک کە رێککەوتنی کۆتایی لەسەر کراوە و بڕیارە لە چەند رۆژی داهاتوودا، گرێبەستێک لەوبارەیەوە لەگەڵ کۆمپانیای BP واژوو بکرێت.
