بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازیی لە یان برێم، كونسوڵی گشتیی فەرەنسا لە هەرێم كرد.
لە دیدارێكدا دوایین گۆڕانكارییە سیاسییەكان لەسەر ئاستی ناوچەكە، پێكهێنانی حكومەتی هەرێم و كێشەكانی نێوان هەولێر و بەغداد گفتوگۆیان لەبارەوەكرا.
سەرۆك بافڵ جەلال تاڵەبانی لەبارەی رێكخستنەوە و یەكڕیزیی ماڵی كورد و یەكگووتاری سیاسی راشكاوانە دوا و وتی، هەر بڕیارێك لەبەرژەوەندیی چارەسەری كێشەكانی ژیانی خەڵك و هەرێمەكەمان بێت لەگەڵیداین، بەڵام دەبێت نییەتی جددی هەبێت بۆ كاركردنی پێكەوەیی و هاوبەشێتی راستەقینە چونكە هەر هەوڵێك لە دەرەوەی ئەم ویستە نیشتمانییە بە زیان بۆ گەلەكەمان دەشكێتەوە و لەو رووەوە سەرۆك بافڵ روونیشیكردەوە، ئەركی هەمووانیشە بەرپرسیارانە لەگەڵ ئەم دۆخەدا مامەڵە بكەن و پێكەوە هەنگاوبنێن بۆ دروستكردنەوەی متمانە و پێكهێنانی حكومەتێكی خزمەتگوزار كە بە یەكسانی خزمەتی هەمووان بكات و لەئاست داواكاریی خەڵكیشدابێت.
سەبارەت بە سوریا و رۆژئاوای كوردستان سەرۆك بافڵ جەلال تاڵەبانی رایگەیاند؛ جەختدەكەینەوە كە لەگەڵ ئەوەداین رێز لە ئیرادە و مافی هەموولایەك بگیرێت و كوردیش بەشێكی گرنگ بێت لە سوریای نوێدا چونكە هەر پەراوێزخستنێك زیان بە ئارامی و ئاسایشی وڵاتەكە و ناوچەكەش دەگەیەنێت.
