قوباد تاڵەبانی، جێگری سەرۆك وەزیرانی هەرێم پێشوازیكرد لە ئەرمان تۆپجو، كونسوڵی گشتیی توركیا و لە كۆبوونەوەی نێوانیاندا چەند پرسێكی جێی بایەخی هەردوولا تاوتوێكران.
لە بەشێكی كۆبوونەوەكەدا كە رۆژی چوارشەممە لە هەولێر بەڕێوەچوو، لەبارەی دواگۆڕانكارییە سیاسی و ئەمنییەكانی ناوچەكەوە ئاڵوگۆڕی بیروڕاكرا و لەم چوارچێوەیەدا قوباد تاڵەبانی جەختیكردەوە، پێویستە هەموو لایەنەكانی ناوچەكە بەرپرسیارانە هەنگاو بنێن.
لە تەوەرێكی دیكەدا باسی دۆخی هەرێمی كوردستان و گفتوگۆكانی پێكهێنانی حكومەتی نوێی هەرێم كرا و لەم بارەیەشەوە، جێگری سەرۆك وەزیران ئاماژەی بە گفتوگۆكانی یەكێتی و پارتیدا و روونیكردەوە كە تیمە تەكنیكییەكان گفتوگۆكانیان تەواوكردەوە و بەهیواین لە ماوەیەكی نزیكدا بگەنە رێككەوتن بۆ پێكهێنانی حكومەتێك كە لە ئاستی چاوەڕوانی هاوڵاتییانی هەرێمدابێت.
سەبارەت بە پەیوەندییەكانی نێوان هەرێم و بەغدا، قوباد تاڵەبانی ئاماژەی بەوەدا بۆ چارەسەركردنی ریشەیی كێشە داراییەكان، هەنگاوی زۆر باش نراوە و لە دوای پەسەندكردنی هەمواری یاسای بودجەش زەمینەی لەبار دروستبووە بۆ چارەسەركردنی كێشە و ناكۆكییەكانی دیكەی نێوان هەرێم و بەغداد.
