پێگەی (بەغداد ئەلیەوم) لە هەواڵێکیدا وێنەیەکی خێمەی مامۆستایان و فەرمانبەرانی مانگرتووی بڵاوکردووەتەوە و دەڵێت، لە سلێمانی “خێمەی کەرامەت” هەڵدراوە و لە هەولێر و دهۆکیش، خۆپیشاندەر سەرکوت دەکرێت.
پێگەکە لە نوێترین هەواڵیدا ئاماژەی بەوەکردووە، لە سلێمانی هەڵدانی “خێمەی کەرامەت” پێ دەنێتە هەفتەی دووەمەوە و دەیان مامۆستا و فەرمانبەری پەروەردەیی بەردەوامن لە مانگرتن لە خواردن و داوای چارەسەری قەیرانی مووچە و تەوتین دەکەن.
دەشڵێت، “لەگەڵ ئەو شەپۆلەی خۆپیشاندان و ناڕەزاییەی کە ساڵانە هەرێمی کوردستان دەگرێتەوە، بەهۆی قەیرانی دارایی و چارەسەرنەکردنی کێشەی مووچە، دیارترین پرسیار کە دێتە پێشەوە ئەوەیە: بۆچی خۆپیشاندانەکان تەنیا لە پارێزگای سلێمانین؟ بۆچی ناڕەزایی بەرفراوانی فەرمانبەران و مامۆستایان لە پارێزگاکانی هەولێر و دهۆک نابینین؟ بەتایبەتی کە هەولێر پایتەختی هەرێمی کوردستانە و نووسینگەی نەتەوە یەکگرتووەکان و بارەگای پەرلەمان و حکومەتی تێدایە”.
(بەغداد ئەلیەوم) باسلەوەشدەکات، ئەو ڕێوشوێنە توندانەی کە لایەنە دەسەڵاتدارەکان، لە هەولێر و دهۆک گرتوویانە بەر لە کپکردنەوەی خۆپیشاندانەکان و دەستگیرکردنی بەشداربووان؛ رێگری دەکات لە ئەنجامدانی خۆپیشاندان.
