کەشناسیی هەرێم: شەپۆلێکی بەفر و باران هەرێم دەگرێتەوە

کەشناسیی هەرێم رایگەیاند، “سبەینێ شەپۆلێکی بەفر و بارانبارین هەرێمی کوردستان دەگرێتەوە”.

بەڕێوەبەرایەتیی گشتیی کەشناسی و بومەلەرزەزانیی هەرێم لە راگەیەندراوێکدا بڵاویکردەوە، “ئەمڕۆ سێشەممە ئاسمان بەگشتى ساماڵ و پەڵەهەور دەبێت، پلەی گەرمی بەراورد بە تۆمارکراوەکانى دوێنێ کەمێک بەرزدەبێتەوە”.

باس لەوەشدەکات، “سبەینێ چوارشەممە لە کاتەکانى بەیانى تاوەکو دواى نیوەڕۆ ئاسمان ساماڵ و پەڵەهەور دەبێت، لەدواى نیوەڕۆ ئاسمان دەگۆرێت بۆ نیمچەهەور و لە ئێوارە بۆ هەور دەگۆڕێت، شەپۆلێکی بارانبارین ناوچەکەمان دەگرێتەوە”.

کەشناسیی هەرێم دەڵێت، “لەسەر بەشێک لە ناوچە شاخاوییەکان و هەندێک ناوچەى جیاجیا نمەباران دەبارێت و لە ناوچە سنوورییەکان لە درەنگانى شەو بەفر دەبارێت، پلەی گەرمی لەدواى نیوەڕۆ کەمێک بەرزدەبێتەوە و لە ئیوارە و شەودا بە (2-4) پلەى سیلیزى نزمدەبێتەوە”.

بەرزترین پلەی گەرمیی پێشبینیکراو بە پلەی سیلیزی :

هەولێر     : 19پلەى سیلیزى

سلێمانی  :   17پلەى سیلیزى

دهۆک     : 18 پلەى سیلیزى

کەرکوک  : 21 پلەى سیلیزى

زاخۆ      :  20 پلەى سیلیزى

هەڵەبجە : 18  پلەى سیلیزى

حاجی ئۆمەران: 7  پلەى سیلیزى

سۆران: 16 پلەى سیلیزى

گەرمیان  : 21 پلەى سیلیزى