ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، ئەو وەفدەی لە هەرێمی كوردستانن تەواوی زانیارییەكان لەبارەی تەرخانكراوی دارایی هەرێم كۆدەكەنەوە و دواتر راپۆرتێك ئامادەدەكەن بۆ سەرۆك وەزیرانی عێراق و لەسەر ئەو بنەمایە بڕیار لەبارەی مووچەی مانگی 12ی ساڵی رابردوو دەدرێت.
د. نەرمین مەعروف، ئەندامی لیژنەی دارایی لە ئەنجومەنی نوێنەرانی عێراق لە لێدوانێكدا رایگەیاند، بەپێی رێككەوتنەكان هەناردەی نەوتی هەرێم لە رێگای سۆمۆوە دەستپێدەكاتەوە و ئەو كات هەرێم دەتوانێت شایستەی دارایی خۆی وەربگرێت.
وتیشی، “مەرجە مووچەی سەرجەم مووچەخۆران بەپێی بڕیاری دادگای فیدراڵیی عێراق بەبانكی بكرێت و ئەو وەفدەی لە هەرێمی كوردستانن تەواوی زانیارییەكان لەبارەی تەرخانكراوی دارایی كۆدەكەنەوە و دواتر راپۆرتێك ئامادەدەكەن بۆ سەرۆك وەزیرانی عێراق و لەسەر ئەو بنەمایە بڕیار لەبارەی مووچەی مانگی 12ی ساڵی رابردوو دەدرێت”.
