هەسەدە پوچەڵكردنەوەی هێرشی گروپە چەكدارەكان بۆ سەر رۆژهەڵات و باشووری مەنبج و كوژرانی ژمارەیەك لە چەكدارانی هێرشبەر رادەگەیەنێت.
ناوەندی راگەیاندنی هێزەكانی سوریای دیموكرات (هەسەدە) رایگەیاند، لەمیانەی هەوڵە چڕەكانی داگیركاریی توركیا و گروپە بەكرێگیراوەكان بۆ پێشكەوتن لە بەرەكانی شەڕ لە بەنداوی تشرین و ناوچەكانی باشووری رۆژهەڵاتی، هێزەكانی ئەنجومەنی سەربازیی مەنبج دوێنێ رووبەڕووی سەرجەم ئەو هێرشانە بووەوە كە بە پاڵپشتیی فڕۆكەوانیی سەربازی و درۆنی توركی ئەنجامدران و پوچەڵكرانەوە و، زیانی زۆریش لەنێو بەكرێگیراواندا كەوتەوە.
روونیشیكردەوە، كاتژمێر ی پاشنیوەڕۆی دوێنێ، گروپەكان هێرشیانكردەسەر گوندەكانی دەوروبەری بەنداوی تشرین و، پێكدادان لەنێوان هێزەكانیان و بەكرێگیراوان تا كاتژمێر 5ی ئێوارە بەردەوام بوو. لە كاتژمێرەكانی بەیانیشدا ناوچەكە لەلایەن توركیاوە بە بۆمبهاوێژ بە چڕی بۆردومانكرا، دواتریش هێرشیان بۆسەر تلە سیریتل ئەنجامدا، بەڵام هێزەكانیان رووبەڕووی هێرشەكە بوونەوە و ئۆتۆمبێلێكی گوێزەرەوەی چەكداران لەناوبرا و شەش چەكداری ناوی كوژران.
هاوكات لەگەڵ ئەو هێرشەدا لە كاتژمێر 1:30 خولەكی پاشنیوەڕۆ، چەكداران هێرشیانكردەسەر كێڵگەی “ئەبو سەعید”، هێزەكانی هەسەدە رووبەڕوویان بوونەوە و پێنج چەكدار كوژران.
بەپێی راگەیەندراوەكە سەرجەم هێرشەكان لەلایەن هێزەكانیانەوە تێكشكێندرا و “دوژمن زیانی گیانی و چەك و كەلوپەلی سەربازیی گەورەی پێگەیشت”.
باسی لەوەشكرد، رۆژی هەینی لەلایەن “داگیركاری توركیاوە” كارگەی شەكر لە رۆژهەڵاتی شاری دێر حافر بە فڕۆكەی سەربازی بۆردومانكرا و بووەهۆی داڕوخانی بەشی گرنگی كارگەكە، سەرەڕای ئەوەی دامەزراوەیەكی مەدەنی و زیندووە و خزمەت بە هاوڵاتییان دەكات.
