قائیمقامیەتی سلێمانی ڕایگەیاند، سەنتەرێكی چارەسەری سروشتییان داخستووە بەهۆی ئەوەی “دەبەیەك ئاوی كەرەوزی بە 120 هەزار فرۆشتووە”.
لە ڕاگەیەندراوێكدا قائیمقامیەتی سلێمانی ڕایگەیاندووە، “ئەمشەو دووشەممە 18ی كانونی دووەم، لیژنەی تەندروستیی سەربە لیژنە هاوبەشەکانی قائیمقامیەتی قەزای مەڵبەندی سلێمانی دوای ئەوەی سکاڵایان لەلایەن چەند هاوڵاتییەکەوە پێ دەگات، دەچنە سەنتەری بەڵاڵوک بۆ چارەسەرە سروشتییەکان لە گەڕەکی چوارباخی سلێمانی”.
قائیمقامیەتی سلێمانی ئاماژەی بەوەشكردووە، “دوای لێکۆڵینەوە دەردەکەوێت، خاوەن دووکانەکە دەبەیەک ئاوی کەرەوزی بە ناوی چارەسەری سروشتییەوە بە 120 هەزار دینار بە هاوڵاتییان فرۆشتووە”.
لیژنەکەی قائیمقامیەت ڕاستەوخۆ هەستاوە بە داخستنی دووکانەکە و گرتنەبەری ڕێکاری یاسایی بەرامبەر بە خاوەنەکەی، وەك لە ڕاگەیەندراوەكەدا هاتووە.
