لە بازاڕی سەوزە و میوەی شاری سلێمانی “عەلوە” دەستبەسەر بڕێک فاسۆلیای تەڕدا گیرا کە پێکهاتەکەی ژەهراوی بووە.
زرنگ محەمەد بەرێوەبەری کارگێڕی کوالێتی کۆنتڕۆڵی عەلوەی سلێمانی لەلێدوانێکیدا بە تۆڕی میدیایی ئێستای رایگەیاند، “دەستبەسەر نزیکەی 70 تۆن لە فاسۆلیای تەڕدا گیراوە کە ژەهراوی بوون و بە رێژەیەکی زۆر ماددەی نیترات لە پێکهاتەکەیدا هەبووە”.
وتیشی، ماددەی نیترات بەشێوەیەکی ئاسایی پێویستە لەناو خۆراکدا لە نێوان سفر بۆ 30 ملیگرام بێت، بەڵام لەم فاسۆلیایەدا زیاتر لە دوو هەزار میلیگرامە.
ئاماژەی بەوەشدا، لە خاڵە سنورییەکاندا تەنها پشکنینی فیزیایی بۆ سەوزە و خۆراکەکان دەکرێت وەک تام و بۆن و رەنگ، بەڵام پشکنینی کیمیایی بۆ بەرهەمەکان ناکرێت، ئەمەش بووەتە هۆی تێپەڕینی بەرهەمەکە بۆ ناو بازاڕی سەوزە و میوە.
وتیشی، هیوادارم بەشێوەیەکی کاتی هاوڵاتییان لە بەکارهێنانی فاسۆلیای تەڕ دووربکەونەوە تا رێکاری پێویست ئەنجامدەدرێت، چونکە ئەو فاسۆلیایەی ئێستا لە بازاڕدا بوونی هەیە، لە عەلوەی سلێمانییەوە دابەشنەکراوە.
