بەڕێوەبەری کەشناسیی سلێمانی رایگەیاند، ئەو بازنە سپیانەی بەیانی ئەمڕۆ لە ئاسمانی سلێمانیدا دەرکەوتن بەهۆی تێپەڕینی فڕۆکەوە بووە بە هەوایەکی سارددا لە ئاسماندا.
ئاسۆ کەمال بەڕێوەبەری کەشناسیی سلێمانی بە تۆڕی میدیایی ئێستای راگەیاند، بەیانی ئەمڕۆ چەند بازنەیەکی سپی لە ئاسمانی سلێمانی دەرکەوت، ئەمە حاڵەتێکی ئاساییە و بەزۆری لە کەشە ساردەکاندا روودەدات.
ئاماژەی بەوەشکرد، کاتێک فڕۆکە بە ئاسماندا تێدەپەڕێت و جۆرێک لە هەڵم و هەوایەکی گەرم بە ئاسماندا بڵاودەکاتەوە، ئەگەر لەو کاتەدا لە ئاسمان بەشێوەیەکی بەرچاو پلەی گەرمی نزمبێت، دیاردەیەک دروستدەکات، وەک ئەوەی ئەم بەیانییە لە ئاسمانی سلێمانی بینیمان کە دەتوانین بڵێین وەک جۆرێک لە هەوری دەستکرد لە ئاسمان خۆی پیشانداوە.
وتیشی، ئەم هەورە وەک هەوری دیکە نییە بمێنێتەوە و یان ببێتە هۆی دابارین، هەر ماوەیەکی کەم دەرکەوتووە و دواتر بە ئاسماندا بڵاوبووەتەوە و دیارنەماوە.
