ئەنجومەنی باڵای دادوەریی عێراق لەبارەی بەڕێوەچوونی دۆسیەی دەستگیرکردنی دۆناڵد ترەمپ، سەرۆکی ویلایەتەیەکگرتووەکانی ئەمریکا ڕونکردنەوەیەکی بڵاوکردەوە و دەڵێت، دۆسیەکە لای دادگای ڕەسافەیە و بەپێی مادەی 406 لە سزادانی عێراقی بڕیاری بۆ دەرچووە.
لە ڕاگەیەندراوێكدا ئەنجومەنی باڵای دادوەری عێراق دەڵێت، ” دوای ته‌واوبونی رێكاره یاسایه‌كان و لێكۆڵینه‌وه‌كان له دۆسیه‌ی كوشتنی سه‌ركرده‌كانى حەشدی شەعبی ئه‌بومه‌هدی موهه‌ندیس وهاوڕێكانى و وه‌رگرتنی وته‌ی شایه‌تحاڵه‌كانی ئه‌و ڕوداوه، فه‌رمانی ده‌ستگیركردنمان بۆ دۆناڵد تره‌مپ ده‌ركردووە”.
لە دۆسیەی دەرکردنی بڕیاری دەستگیرکردن بۆ دۆناڵد ترەمپ، نوێنەری باڵیۆزخانەی ئێرانیشی تێدایە لە بەغداد، ئەنجومەنی باڵای دادوەریی عێراقیش دەڵێت، ” به‌دواداچونه‌كانی نوێنه‌ری یاسایی باڵیۆزخانه‌ی ئێران له به‌غداد بۆ كه‌یسه‌كه به‌نوێنه‌رایه‌تی داواكارانی گشتی عێراق، سنوردار و به‌پێی یاسا و بۆ زانینی رێكاره‌كانی دادگا و چۆنیه‌تی به‌رێوه‌بردنی ئه‌و كه‌یسه بووه”.
دەرچونی بڕیاری دەستگیرکردن بۆ دۆناڵد ترەمپ ، سەرۆکی ئەمریکا لە عێراقەوە دوای ئەوە هات کە وەزارەتی دادی ئێرانیش بڕیاری دەستگیرکردنی دۆناڵد ترەمپی دەرکردبوو، وەک وەزارەتی دادی ئێران ئاماژەی پێکردووە، ئەوان پۆلیسی ئینتەرپوڵیشیان ئاگادارکردووەتەوە بۆ دەستگیرکردنی دۆناڵد ترەمپ.
