پاسێکی خوێندنگە خۆی کرد بەناو خەڵکدا و 11 کەس گیانیان لەدەستدا کە پێنجیان خوێندکارن.
تەلەفزیۆنی رەسمیی چین بڵاویکردەوە، پاسێکی خوێندنگە ئەمڕۆ سێشەممە، لەبەردەم خوێندنگەیەکی ناوەندیدا خۆی کردووە بە ناو خەڵکدا و بەهۆیەوە 11 کەس گیانیان لەدەستدا کە پێنجیان خوێندکارن.
رووداوەکە کاتژمێر 7:27 خولەکی بەیانیی ئەمڕۆ لە بەردەم خوێندنگەیەکی شاندۆنگ روویداوە کاتێک کە شۆفێرەکە کۆنتڕۆڵی پاسەکەی لەدەستداوە و خۆی بە کۆمەڵێک منداڵ و دایک و باوکدا کێشاوە کە لەسەر شۆستەکە وەستاون.
چەند وێنەیەک لە تۆڕە کۆمەڵایەتییەکاندا بڵاوبووەتەوە کە دەردەکەوێت ژمارەیەک دایک و باوک بەهانای چەند منداڵێکەوە دەچن کە بە جلی خوێناوییەوە لەسەر شۆستەکەن.
پۆلیسی ناوچەکە شۆفێرەکەی دەستگیرکردووە و لێکۆڵینەوەی لەگەڵ دەکرێت.
ئەم هەفتەیە ساڵی نوێی خوێندن لە زۆرێک لە خوێندنگە حکومییەکانی چین دەستیپێکرد.
زۆرجار رووداوی هاتوچۆی کوشندە لە چین روودەدات بەهۆی لاوازیی ستانداردەکانی سەلامەتی و لێخوڕینی بێباکانە.
