حكومەتی هەرێم رایدەگەیەنێت، کۆمپانیای عێراقی بۆ دەستەبەری بانکەکان، پشتیوانیی خۆی بۆ پرۆژەی “هەژماری من” راگەیاندووە و دەڵێت، هەشت بانکە بەشداربووەکەی پرۆژەكە لەلایەن کۆمپانیاکەیانەوە گرەنتی کراون.
فەرمانگەی میدیا و زانیاریی حكومەتی هەرێم رایگەیاند، کۆمپانیای عێراقی بۆ دەستەبەری بانکەکان، کە گرنگی بە متمانەی بانکی و پاراستنی سەرمایەی خەڵک لە بانکەکان دەدات، بە شێوەیەکی رەسمی پشتیوانیی خۆی بۆ پرۆژەی “هەژماری من” راگەیاند و نووسیویەتی، هەشت بانکە بەشداربووەکەی “هەژماری من” لەلایەن کۆمپانیاکەیانەوە گرەنتی کراون.
فەرمانگەكە دەشڵێت، كۆمپانیاكە ئاماژەی بەوەداوە “هەشت بانک لە دەستپێشخەریی (هەژماری من) بەشدارن، کە لەلایەن حکومەتی هەرێمی کوردستانەوە دەستیپێکرد. ئامانجی پڕۆژەکە مۆدێرنکردنی کەرتی بانکی و بەرزکردنەوە و پەرەپێدانی ئابورییە لە هەرێمی کوردستان و خێراکردنی پرۆسەی گۆڕانکاریی ئەلیکترۆنییە لە خزمەتگوزارییە حکومییەکاندا”.
دووپاتیشیكردەوە، تاکوو ئێستا هەشت بانکی فەرمی بەشدارییان لە پرۆژەی “هەژماری من” کردووە، کە بریتین لە (BBAC, TBI, BOB, IDB, RTB, NBI, Cihan Bank, IIB).
