لە وڵاتی ئیمارات بڕیاردرا نوێژ و وتاری هەینی بۆ 10 خولەک کەمبکرێتەوە و بڕیارەکەش لە ئەمڕۆوە جێبەجێکرا.
دەستەی گشتیی کاروباری ئیسلامی و ئەوقاف و زەکات لە ئیمارات لە ئاگادارییەکدا بڵاویکردەوە، پێویستە لەسەر وتاربێژی مزگەوتەکان لە ئەمڕۆوە هەتا سەرەتای مانگی تشرینی یەکەم کاتی نوێژ و وتاری هەینی کورت بکەنەوە بە شێوەیەک بە هەردووکیان 10 خولەک تێنەپەڕێنێت.
ئاشکراشیکرد، بڕیارەکە بۆ پاراستنی نوێژخوێنانی وڵاتەکەیە لەو گەرمایەی گرتوویەتییەوە.
جەختیشیکردووەتەوە، سەرجەم پێداویستییەکانی فێنککەرەوە بۆ مزگەوتەکان تەرخانکراوە تا نوێژخوێنان بە دڵنیایی و ئاسوودەییەکی زیاترەوە ئەرکە ئاینییەکانیان جێبەجێبکەن.
