ماوەی چوار رۆژە گەڕان بەدوای تەرمی ئەو منداڵەی لە ئاوی چۆمان خنكا بەردەوامە و بەرگریی شارستانیی سۆران دەڵێت، تیمەكانیان بە درێژایی رووبارەكە چاودێری دەكەن.
رائید رەوەند مەغدید، وتەبێژی بەرگریی شارستانیی سۆران بە تۆڕی میدیایی ئێستای رایگەیاند، ئەمڕۆ بۆ چوارەمین رۆژە تیمەكانیان سەرقاڵی گەڕانن بەدوای تەرمی (ئەیهان)ی تەمەن پێنج ساڵان، بەڵام تائێستا هیچ ئەنجامێك بەدەستنەهاتووە.
وتیشی، “لەئێستادا تیمەكانمان بە درێژایی رووبارەكە چاودێری دەكەن و، چەند تیمێك لە چەند شوێنێكی جیاجیا سەرقاڵی ئەوكارەن”.
ئاستی ئاوی رووبارەکان زۆر بەرز و لێژ و تیژڕەوە و، پلەی گەرمی ئاوەکەی زۆر زۆر ساردە، ئەمەش ئاستەنگی لەبەردەم كارەكانی گەڕان دروستكردووە، رائید رەوەند وای وت.
رۆژی هەینی دوای ئەوەی خێزانێکی دانیشتووی هەولێر بەمەبەستی گەشت و سەیران روویان لە شارۆچکەی گەڵاڵە کرد، منداڵەكەیان كەوتە ناو رووباری چۆمان، باوکەکەش بەمەبەستی رزگارکردنی خۆی هەڵدایە ئاوەکە و بەهۆیەوە هەردووكیان خنكان.
باوكی منداڵەكە ناوی (سۆران)ە، بە ماوەیەكی كەم پاش رووداوەكە تەرمەكەی دۆزرایەوە.
