ئەو هاوڵاتییەی دوێنێ لە سەیرانگای كونەماسی خنكا، ئەمڕۆ تەرمەكەی دۆزرایەوە.
هاوڵاتییەکە لەگەڵ خانەوادەکەی بەمەبەستی گەشت و سەیران رووی لە سەیرانگای كونەماسی كردووە، لەكاتێكدا ویستویەتی دەستنوێژبگرێت كەوتووەتە ناو ئاوەكە و خنكاوە.
شاهێدحاڵێك بە تۆڕی میدیایی ئێستای راگەیاند، پاش گەڕانێكی زۆر نیوەڕۆی ئەمڕۆ تەرمەكەی دۆزرایەوە.
پێشتر عوسمان ئەنوەر، قائیمقامی قەزای چوارتا رایگەیاند، هاوڵاتییەکە تەمەنی زیاتر لە 70 ساڵە، کەسوکارەکەی و تیمی غەواس و تیمی هێزە ئەمنییەکان بە هاوکاری خەڵکی ناوچەکە و مەلەوانەکانی ناوچەکە سەرقاڵی گەڕانن بەدوای تەرمەکەیدا.
وتیشی، “وەک هەمیشە جارێکی دیکە داوا لە هاوڵاتییان دەکەین خۆیان لەو شوێنانە بە دووربگرن کە غەسالەی لێیە، بەهۆی ئەوەی کاری تێدا دەکرێت و گۆمەکان قوڵدەبن و داوا لە هەموو هاوڵاتییان دەکەین، چەمەکان شوێنی مەلەکردن نین”.
