ئەمڕۆ ئەنجومەنی وەزیرانی هەرێم کۆبوونەوەی ئاسایی هەفتانەی خۆی ئەنجامدەدات.
لە راگەیەندراوێکی ئەنجومەنی وەزیراندا هاتووە، لە بەشی یەکەمی کۆبوونەوەکەدا راپۆرتی هاوبەشی وەزارەتی دارایی و ئابووری و وەفدی دانوستانکاری هەرێم سەبارەت بە داڕشتنی میکانیزمی پێویست بۆ جێبەجێکردنی پابەندییەکانی حکومەتی هەرێمی کوردستان لە بواری داهاتەکان و بە بانکیکردنی پێدانی مووچە دەخرێتە روو.
هاوکات لە بەشی دووەمی کۆبوونەوەکەدا، چەند پێشنیازێکی تایبەت بە ئاسانکاریی گەڕاندنەوەی پێشینەکان لای هاوڵاتییان، هەروەها قەرزی بانکە بازرگانییەکان و رێژەی سوودی بانکی دەخرێتەڕوو.
لە بەشی سێیەم و کۆتایی کۆبوونەوەکەدا، دەنگ لەسەر رەشنووسی پەیڕەوی پۆلێنکردنی بەڵێندەران و دانان لە لیستی بێبەشکردن لە بەشداربوون دەدرێت.
