بانکی ناوەندیی عێراق زیاتر لە 273 ملیۆن دۆلاری خستەبازاڕەوە، بەیانی ئەمڕۆ لەگەڵ کردنەوەی بازاڕەکانی دراو دۆلار رووی لەدابەزین کرد، لەکاتێکدا دوێنێ بەشێوەیەکی بەرچاو تا 149 هەزار و 250 دینار بەرزبووەوە.
ئەمڕۆ دووشەممە، بانکی ناوەندیی عێراق خشتەی خستنەڕووی دۆلاری بڵاوکردەوە، کۆی گشتیی دۆلاری ئەمڕۆی بانکەکە 273 ملیۆن و 786 هەزار و 53 دۆلار بووە.
لەو بڕە، 10 ملیۆن و 280 هەزار دۆلاری کاش بووە و 263 ملیۆن و 506 هەزار و 53 دۆلاری بەشێوەی حەواڵاتی بازرگانی بووە.
بەهای دۆلار ئەمڕۆ بۆ خوار 149 هەزار دینار دابەزینی بەخۆیەوە بینییەوە و لە پێش کاتژمێر 11دا بەهای 100 دۆلار بۆ 148 هەزار و 500 دینار دابەزی و لە کاتژمێر 11:40 خولەکدا بەهای 100 دۆلار 148 هەزار و 650 دینار بوو.
