ئەنجومەنی مامۆستا و فەرمانبەرانی ناڕازی پاڵپشتیی بڕیارەكانی دادگای فیدراڵی تایبەت بە بنەجێكردنی مووچە دەكات و بە زۆرەملێ سەپاندنی (هەژماری من)یش رەتدەكاتەوە.
دڵشاد میرانی، ئەندامی دەستەی ئەنجومەنی مامۆستا و فەرمانبەرانی ناڕازی لە لێدوانێكدا داوای لە مامۆستا و مووچەخۆران كرد پشتگیری لە بڕیاری دادگای باڵای فیدڕاڵی بكەن بۆ بنەجێكردنی مووچە لە بانكە عێراقییەكان.
هەروەك بەناوی ئەنجومەنەكەوە پرۆژەی (هەژماری من)ی رەتكردەوە و وتی، “بەداخەوە حزبێكی دیاریكراو دەیەوێت بە زۆرەملێ بەسەر فەرمانبەرانی هەرێمی كوردستاندا بیسەپێنبێت”.
میرانی باسی لەوەشكرد، (هەژماری من) لەلایەن حكومەتی عێراقەوە رەتكراوەتەوە و هیوای ئەوەشی خواست لەڕێی بانكە فیدراڵییەكانی رەشید و رافیدەین كە “لە چەند رۆژی داهاتوودا بنكەكانیان لە شارەكانی هەرێمی كوردستان دەكرێتەوە” مووچەخۆرانی هەرێم بە مافەكانی خۆیان بگەن.
بەهۆی ترس لە دەستبەسەراگرتن، دواخستن و نەدانی مووچە لەلایەن بەشێك لە كاربەدەستانی حكومەتی هەرێمەوە، مووچەخۆرانی هەرێم بنەجێكردنی مووچە لەو پرۆژە بانكییەی هەرێم رەتدەكەنەوە و دەیانەوێت بە بانكیكردنی مووچەكانیان لەڕێی بانكە فیدراڵییەكانەوە بێت.
