زانکۆی سلێمانی دەبێتە ئەندامی تۆڕی کاریگەریی ئەکادیمیی نەتەوەیەکگرتووەکان، کە 1600 دامەزراوەی ئەکادیمی لە کۆی 150 وڵات لە سەرتاسەری جیهاندا لەخۆدەگرێت.
زانکۆی سلێمانی لە راگەیەندراوێکدا بڵاویکردەوە، لە رێککەوتی 21ی ئازاری 2024دا، زانکۆی سلێمانی بە فەڕمی بووە ئەندامی تۆڕی کاریگەریی ئەکادیمیی نەتەوەیەکگرتووەکان، کە 1600 دامەزراوەی ئەکادیمی لە کۆی 150 وڵات لە سەرتاسەری جیهاندا لەخۆدەگرێت.
لە راگەیەندراوەکەی زانکۆی سلێمانیدا هاتووە، کاریگەریی ئەکادیمیی نەتەوەیەکگرتووەکان دەستپێشخەرییەکی جیهانییە و هانی زانکۆکان دەدات پێکەوە کار بۆ ئامانجە درێژخایەنەکانی نەتەوەیەکگرتووەکان بکەن، لەڕێی ئەندامێتی لەم تۆڕەدا، زانکۆی سلێمانی دەتوانێت سوود لەو ۆرکشۆپ و بەرنامەی راهێنانانە وەربگرێت کە پەیوەستن بە ئامانجەکان، جگە لەوەش زانکۆی سلێمانی (ئامرازێکی ئۆنلاین)ی دەخرێتە بەردەست کە هاوکاریی زانکۆ دەکات لە چۆنیەتی کارکردنی لەسەر ئامانجەکان و لەمەودا زانکۆی سلێمانی دەشتوانێت بابەت دەربارەی ئامانجەکان لە ماڵپەڕی UNAIدا بڵاوبکاتەوە.
زانکۆی سلێمانی لە راگەیەندراوەکەدا ئاماژە بەوەش دەکات، لە ڕێگەی ئەنجامدانی چالاکی لەناو و دەرەوەی زانکۆدا، لە ئێستادا زانکۆی سلێمانی سەرقاڵی بڵاوکردنەوەی هۆشیارییە لەسەر ئامانجەکان و کاریش بۆ بەدیهێنانیان دەکات.
