باسم عەواد، وتەبێژی رەسمی حکومەتی عێراق راگرتنی ناردنی پارەی مووچەی فەرمانبەرانی هەرێمی کوردستان رەتدەکاتەوە و دەڵێت، “ناردنی پارە بۆ هەرێم بەردەوام دەبێت”.
وتەبێژی رەسمی حکومەتی عێراق لە لێدوانێکیدا بە ئاژانسی هەواڵی عێراقی راگەیاندووە، “دابینکردنی بودجەی مووچەی فەرمانبەرانی هەرێمی کوردستان بەپێی رێککەوتنێک و بە هاوکاری لەگەڵ حکومەتی هەرێم بەردەوام دەبێت و ئەو هەواڵانەی باس لە وەستاندنی ناردنی پارە دەکەن دوورن لە راستیەوە”.
سەبارە بە مووچەی مانگی ئازار وتەبێژی رەسمی حکومەتی عێراق دەڵێت، “وەزارەتی دارایی عێراق پابەندە بە دابینکردنی بودجە بۆ پێدانی مووچەی فەرمانبەرانی هەرێم بۆ مانگی ئازار، هاوکات پابەندیشە بە هەماهەنگی لەگەڵ وەزارەتی دارایی هەرێم سەبارەت بە خێراکردنی لە پڕۆسەی تەواوکردنی رێکارەکانی خۆجێیکردنی مووچە لە بانکە دیاریکراوەکاندا”.
