سەرۆکی دەستەی دەسپاکیی عێراق ئاماژە بەوە دەکات، ئاشکراکردنی سامان و بەرژەوەندیی دارایی هەموو بەرپرسان و فەرمانبەرانی عێراق دەگرێتەوە و رەشنووسی رێککەوتنێکیش بۆ هەماهەنگی کارکردن لەگەڵ دەستەی دەسپاکیی هەرێمی کوردستان ئامادەیە.
حەیدەر حەنون، سەرۆکی دەستەی دەسپاکیی عێراق لە لێدوانێکیدا رایگەیاند، “ئاشکراکردنی بەرژەوەندیی دارایی سەرجەم بەرپرسان و فەرمانبەرانی عێراقی دەگرێتەوە و دەبێت هەموو کەسێک ملکەچی یاسا بێت”.
ئاماژەی بەوشکرد، “لەگەڵ دەستەی دەسپاکیی هەرێمی کوردستان کاردەکەین بۆ دروستکردنی هەماهەنگی و رەشنووسی رێککەوتنێک لەو بارەیەوە ئامادەکراوە”.
ئەو بەرپرسەی عێراق داوا لە دەستەی دەسپاکیی هەرێم دەکات هاوکاربێت لە فەرمانی دەستگیرکردن و ئاشکراکردنی بەرژەوەندیی دارایی بەرپرسان بۆ ئەوەی بتواندرێت وردبینییان لێبکرێت.
