بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغدا چاویکەوت بە موسەنا سامەڕائی، سەرۆکی ھاوپەیمانیی عەزم و پرسی پێکهێنانی ئیدارەی نوێی شاری کەرکوک و پرسی ئەنجومەنی نوێنەران و هەڵبژاردنی سەرۆكی نوێی ئەنجومەنەکە تاوتوێکرا.
لە دیدارەکەدا گفتوگۆ لەبارەی كەركوك، دیاریكردنی پارێزگار و سەرۆكی ئەنجوومەنی پارێزگای شارەكە کراوەتەوە و جەخت لە گفتوگۆ و هەماهەنگیی نێوان لایەنە براوەكان کراوەتەوە لەپێناو تەواوكردنی رێكارە یاساییەكان و گەیشتن بە ئەنجامێك كە وەڵامدەرەوەی خواستی هەموولایەك بێت.
هاوکات، قووڵكردنەوەی تەبایی و گەشەپێدانی كەلتووری پێكەوەژیان لەنێوان سەرجەم نەتەوە و پێکهاتەكانی كەركووك دووپاتکراوەتەوە و هەردوولا هاوڕابوون، ئیدارەی نوێی شارەكە نموونەی باڵای سەركەوتن و پێكەوەژیان بێت لە هەرێمی كوردستان و عیراق.
بافڵ جەلال تاڵەبانی رایگەیاندووە، پێویستە ئاڕاستەكردنی كەركوك بەرەو ئاوەدانی و خزمەتكردنی خەڵكەكەی بێت و پابەندبوون بێت بە ئەنجامەكان و دووركەوتنەوە لە دەمارگیری و رۆحییەتی تۆڵەسەندنەوە، وتوشیەتی، “نابێت گەورەیی كەركوك و شكۆمەندیی خەڵكەكەی قوربانیی ململانێی ناڕەوای لایەنەكان بن.”
لە لایەکی دیکەشەوە باس لە پرسی ئەنجومەنی نوێنەران و هەڵبژاردنی سەرۆكی نوێ، تەوەرێكی دیکەی دیدارەكە بووە و هەردوولا جەختیان لە بەردەوامیی گفتوگۆكان کردووەتەوە لەپێناو چارەسەركردنی كێشەكان.
