شارەزایەكی بواری گواستنەوەی دەریایی دەڵێت، جموجوڵی كەشتیی كۆنتێنەرەكان لە دەریای سوور لە تشرینی دووەمی رابردووەوە بەڕێژەی نزیكەی 70% كەمیكردووە.
عامی دانیال، دامەزرێنەر و سەرۆكی كۆمپانیای (ویندوورد) كە خزمەتگوزاریی راوێژكاری لە بواری گواستنەوەی دەریایی پێشكەشدەكات رایگەیاند، زانیارییەكانمان نیشانیدەدات كە لەدوای هێرشەكەی سەر گالاكسی لیدەر- ئەو كەشتییەی یاخیبووە حوسییەكان لە یەمەن لە 19ی تشرینی دووەمدا دەستیان بەسەرداگرت و، تائێستا ئەندامانی تیمی كەشتییەكە كە 25 كەسن بارمتەن لایان- ژمارەی ئەو كەشتییانەی تایبەتن بە گواستنەوەی ئۆتۆمبێل و رێگای (رأس الرجاء الصالح) لەوپەڕی باشووری كیشوەری ئەفریقا بەكاردەهێنن، سێ هێندە زیادیكردووە.
گالاكسی لیدەرز-یش كەشتییەكی تایبەت بە گواستنەوەی ئۆتۆمبێلە كە موڵكی كۆمپانیایەكی بەریتانییە و خاوەنەكەی سەرمایەدارێكی ئیسرائیلییە.
دانیال وتیشی، “تێپەڕبوونی ئەو جۆرە كەشتییانە لە دەریای سوور بە رێژەی 90% دابەزیووە. چیتر بەو ناوچەیەدا تێناپەڕن”.
هەرچی سەبارەت بەو كەشتییانەیە كە كاڵای وشكی بەكۆمەڵ دەگوازنەوە (وەك دانەوێڵە، چیمەنتۆ و خەڵوز) ژمارەیان لە دەریای سوور بە رێژەی 15% كەمبووەتەوە، لەوەتەی حوسییەكان هێرشەكانیان دەستپێكردووە.
تەنها كەشتییەكانی گواستنەوەی نەوتن كە بەهەمان ئاستی پێشوو كەناڵی سویس بۆ گواستنەوە وەك كاتی بەر لە هێرشەكان بەكاردەهێنن، شارەزاكە وای وت.
