بەڕێوەبەری گشتیی بازرگانیی هەرێم روونكردنەوە لەبارەی بڕیارێكی حكومەتی عێراق دەدات كە تایبەتە بە مامەڵەكردن لە ناوخۆ لە بری دۆلار بە دینار لە دوای سەری ساڵی نوێوە و دەشڵێت، “ئەگەر لە عێراق جێبەجێبكرێت هەرێمیش بڕیاردەدات كە جێبەجێیبكات و دواجار لە بەرژەوەندیی هاوڵاتییاندایە”.
نەوزاد شێخ كامیل بەڕێوەبەری گشتیی بازرگانیی هەرێم لە لێدوانێكدا بە تۆڕی میدیایی ئێستای راگەیاند، ئەگەر بڕیارەكەی حكومەتی عێراق جێبەجێبكرێت لەبری مامەڵەكردن بە دۆلار بە دینار بێت و دۆلار بە نرخی فەرمی بە بازرگانان دەدرێت و كاریگەری لەسەر دابەزینی نرخی شمەك و كاڵاكان دەبێت.
وتیشی، “دوای سەری ساڵی نوێ لە عێراق ئەو بڕیارە جێبەجێدەكرێت و ناكرێت لە دەروازەیەك ئەو بڕیارە جێبەجێبكرێت و لە ناوچەیەكی دیكە جێبەجێنەكرێت بۆیە هەوڵدەدرێت هەرێمی كوردستانیش پێوەی پابەندبێت و هەر بڕیارێكیش لە بەرژەوەندیی هاوڵاتییاندا بێت حكومەتی هەرێم جێبەجێیدەكات”.
