کۆمسیۆنی باڵای سەربەخۆیی هەڵبژاردنەکان بڵاویکردەوە، ئامادەکارییەکان بۆ دەنگدانی گشتیی تەواوبوون، پێداویستییەکان گەیەندراونەتە بنکەکانی دەنگدان.
داود سڵێمان خزر بەڕێوەبەری رێوشوێن و راهێنان لە کۆمسیۆنی باڵای هەڵبژاردنەکان رایگەیاند، کۆمسیۆن سەرجەم پێداوسیتییە لۆجستیکیەکانی بۆ بنکە و وێستگەکانی دەنگدان گواستووەتەوە، زۆرینەی کامێراکانی چاودێری لە بنکەکان دانراون.
ئاماژەی بەوەشکرد، هێزە ئەمنییەکان تەواوی ئامادەکاری خۆیان لە بنکەکان وەرگرتووە و پلانی کارکردنی خۆیان داناوە.
ئاشکراشیکرد، دوای تەواوبوونی پرۆسەی دەنگدان راستەوخۆ دەنگەکان جیادەکرێنەوە و بە کەمتر لە 24 کاتژمێر ئەنجامی بەرایی رادەگەیەندرێت.
