وەزارەتی نەوتی عێراق رایگەیاند، داهاتی نەوتی مانگی رابردوو گەیشتووەتە زیاتر لە هەشت ملیار دۆلار.
بەپێی راگەیەندراوێكی وەزارەتەكە، كۆی هەناردە و داهاتی نەوتی مانگی تشرینی دووەمی رابردوو بەپێی ئامارە سەرەتاییەكانی كۆمپانیای بەبازاڕكردنی نەوتی عێراق (سۆمۆ) بریتیە لە 102 ملیۆن و 975 هەزار و 782 بەرمیل، بە داهاتی 8.512 ملیار دۆلار.
ئەوەشی روونكردەوە، لەو بڕە 101 ملیۆن و 764 هەزار و 620 بەرمیلی لە كێڵگەكانی ناوەڕاست و باشوور بووە، 172 هەزار و 383 بەرمیلی هەناردەكردن بووە بۆ ئوردن، بڕی هەناردەش لە قیارە-ەوە یەك ملیۆن و 38 هەزار و 779 بەرمیل بووە.
رێژەی هەناردەی رۆژانە گەیشتووەتە سێ ملیۆن و 433 هەزار بەرمیل، ناوەندی نرخی هەر بەرمیلێكیش 82.66 دۆلارە.
ئەوەش لەكاتێكدایە بڕی نەوتی خامی هەناردەكراوی عێراق لە مانگی تشرینی یەكەمدا گەیشتووەتە 109 ملیۆن و 545 هەزار و 589 بەرمیل بە داهاتی 9 ملیار و 593 ملیۆن و 643 هەزار دۆلار.
