بەڕێوەبەری دەزگای تەندروستیی پێشمەرگە هۆشداری لە خراپیی دۆخی پزیشك و كارمەندەكانیان بەهۆی بێ مووچەییەوە دەدات و داوا لە حكومەتی هەرێم دەكات بۆ رێگریكردن لە “كارەسات”، مووچەی فەرمانبەران و كەرتی تەندروستی بە تایبەت دابەشبكرێت.
شەماڵ جەبار یاوەر، بەڕێوەبەری دەزگای تەندروستیی پێشمەرگە پەیامێكی بڵاوكردەوە و رایگەیاند، “داوا لە هاوڵاتییان دەكەم كە قورسایی سەر فریاكەوتنەكانمان كەمبكەنەوە و هاوكارمان بن تەنها بۆ حاڵەتی فریاكەوتن و گەرم بچنە فریاكەوتنەكان، داواش لە حكومەتی هەرێم دەكەم بە زووترین كات مووچە و شایستەی فەرمانبەران و تایبەت كەرتی تەندروستی دابینبكرێت بۆ رێگری لە كارەسات”.
ئاماژەی بۆ ئەوەش كرد، ئێمە وەك دەزگای تەندروستی ناتوانین و نابینە بەدیلی كەرتی تەندروستیی گشتی بە راستی لەم چەند ڕۆژە قورسایی گەورەمان لەسەرە، لەگەڵ ئەوەی ئێمە وەك بەشێك لە هێزی پێشمەرگەی كوردستان لە ئەركدا بەردەوامین و دەبین، بەڵام پشتیوانی داوا رەواكانی هاوپیشەكانمانین و بە تەنها ئەركی خزمەتی تەندروستی بە ئێمە ناكرێت.
وتيشی، “كارمەند و پزیشكانی ئێمەش بێ مووچە و بێ دەرامەتن ئەگەر كەرتی تەندروستی بە گشتی بچنە مانگرتنەوە ئەو ئەركە بۆ ئێمە زۆر قورس و دژوارە و لەسەروو توانای ئێمەوەیە”.
