وەزارەتی بازرگانیی و پیشەسازیی هەرێم ئاشکرایدەکات، هەر هاوڵاتییەک زیاتر لە مانگێک سەردانی بریکار نەکات، بەشە خۆراکەکەی دەگەڕێتەوە کۆگاکان و ناوی لە لیستی بریکاری دەبڕدرێت.
وەزارەتی بازرگانیی و پیشەسازیی هەرێم بڵاویکردەوە، “رۆژی سێشەممە کۆتا رۆژی دابەشکردنی بەشە خۆراکی سەبەتەی حەوتەمی ساڵی 2023 بوو لە پارێزگای هەولێر، کە لەسەر لیستی بریکاری مانگی تەمموزی 2023 دابەشکرا کە پێکهاتبوو لە (شەکر، زەیت، دۆشاوی تەماتە، لەتکە نۆک، فاسۆلیا، برنج) تەنها هاوڵاتییانی بنکەکانی 216 و 221 لەبری فاسۆلیا نیسکیان وەرگرتووە”.
باسیلەوەشکرد، “ئاگاداری بریکارەکان دەکەینەوە لە هەفتەی داهاتوو دەست دەکەین بە دابەشکردنی سەبەتەی هەشتەم ، لەسەر لیستی بریکاری مانگی ئابی 2023، داوا لە بریکارەکانی خۆراک و دەکەین دوکان و شوێنەکانیان ئامادە بکەن داوا لە هاووڵاتیان دەکەین سەردانی بریکارەکانیان بکەن و بەشە خۆراکی مانگانەیان وەربگرن، هەر هاوڵاتییەک زیاتر لە مانگێک سەردانی بریکار نەکات، بەشە خۆراکەکەی دەگەڕێتەوە کۆگاکان و ناوی لە لیستی بریکاری دەبڕدرێت”.
