وەزارەتی شارەوانیی هەرێم بڕیاریدا بە درێژكردنەوەی ماوەی لێخۆشبوون لە كرێی بەستنی پێوەری ئاو تاوەكو 21ی ئەم مانگە.
بەپێی راگەیەندراوێكی وەزارەتی شارەوانی كە وێنەیەكی دەست تۆڕی میدیایی ئێستا كەوتووە و تێیدا هاتووە، هەر ماڵێك پێوەر نەبەستبێت ئەوا بۆ هەر مانگێك كرێی ئاو 80 هەزار دیناری لێ‌وەردەگیرێت، بەڵام بەپێی بڕیاری داشكاندنەكە ئەو پارەیە كەمكراوەتەوە بۆ 20 هەزار دیناری مانگانە لەناو شار و 10 هەزار دینار لە دەرەوەی شارەكان.
لە راگەیەندراوەكەدا هاتوووە، ژمارەی هاوبەشانی ئاو یەك ملیۆن و 30 هەزار و 408 هاوبەشە كە 850 هەزار و 330 هاوبەش پێوەری ئاویان بەستووە و بە گشتی تائێستاش 82%ی هاوبەشەكان پێوەریان بەستووە”.
ئاماژە بۆ ئەوەش كراوە، كرێی بەستنی پێوەر لە سەنتەری پارێزگاكان بۆ 20 هەزار دینار و لە قەزا و ناحیە و ئەو شوێنانەی كە پێویستە پێوەری لێببەسترێت بۆ 10 هەزار دینار كەمكراوەتەوە.
