هونەر جەمال وتەبێژی وەزارەتی دارایی هەرێم رایدەگەیەنێت، دانەوەی پاشەكەوتی مووچە، ساڵانە پێویستی بە یەك تریلیۆن دینارە و بەبێ تەرخانكردنی بڕە پارەیەك لە بودجەی عێراقدا ناتوانرێت پاشەكەوت بگەڕێندرێتەوە و دەشڵێت، ئەگەر پێشنیازی گەڕاندنەوەی پاشەكەوت كراوە سوپاستان دەكەین و بودجەی بۆ تەرخانبكەن با 10% نەبێت، بەڵكو 20% و 30% بدرێتەوە بە مووچەخۆران.
هونەر جەمال وتەبێژی وەزارەتی دارایی هەرێم لە كۆنگرەیەكی رۆژنامەوانیدا رایگەیاند، گەڕاندنەوەی پاشەكەوتی مووچە پێویستی بە تەرخانكردنی بودجە هەیە و وتیشی، “دانەوەی ئەو 10٪ـی پاشەكەوتەی مانگانە باسدەكرێت پێویستی بە زیاتر لە 90 ملیار دینار و ساڵانە زیاتر لە یەك ترلیۆن دینارە”.
ئاشكراشیكرد، ” بەبێ هیچ تەرخانكراوێك لە بودجەدا ناتوانرێت پاشەكەوت بۆ مووچەخۆران بگەڕێندرێتەوە و ئەگەر پێشنیازی گەڕاندنەوەی پاشەكەوت كراوە سوپاستان دەكەین و بودجەی بۆ تەرخانبكەن با 10% نەبێت بەڵكو 20% و 30% بدرێتەوە بە مووچەخۆران”.
