بەڕێوەبەری نەخۆشخانەی د. جەمال ئەحمەد رەشیدی منداڵان رایگەیاند، حاڵەتەکانی تووشبوون بە هەوکردنی پەردەی مێشک کەمیانکردووە و دۆخەکە لەژێر کۆنتڕۆڵدایە.
د. پشدەر عەبدوڵا بەڕێوەبەری نەخۆشخانەی د. جەمال ئەحمەد رەشیدی منداڵان بە تۆڕی میدیایی ئێستای راگەیاند، “حاڵەتەکانی هەوکردنی پەردەی مێشک روویان لە کەمبوونەوە کردووە، ئێستا رۆژانە 5-10 حاڵەتی نوێ تۆماردەکرێن”.
وتیشی، “حاڵەتەکانی تووشبوون بە سکچوون و رشانەوە رووی لە زیادبوون کردووە، بەڵام نەگەیشتووەتە ئاستی مەترسیدار و لەژێر کۆنتڕۆڵدان، جگە لەوەش پەتای هەڵامەت و ئازاری قورگ و بەرزبوونەوەی تا بڵاوە، بەڵام دیسان ئەوانەش لەژێر کۆنتڕۆڵدان”.
سەبارەت بە کۆنتڕۆڵکردنی دەرمانی ئەنتی بایۆتیک لە دەرمانخانەکان، د. پشدەر عەبدوڵا وتی، “ئێمە بەردەوامین لە هۆشیارکردنەوەی هاوڵاتییان کە بەبێ راوێژی پزیشک ئەو جۆرە دەرمانانە بەکارنەهێنن، بەڵام تا ئێستا بڕیارێک نییە بۆ کۆنتڕۆڵکردنی فرۆشتنی لە نۆرینگە و دەرمانخانەکاندا”.
