لیژنەی دارایی كۆبوونەوەیەكی ئەنجامدا بۆ تەواوكردنی خوێندنەوەی پرۆژەیاسای بودجە و دەنگدان لەسەر ماددەكانی.
فەرمانگەی میدیایی ئەنجومەنی نوێنەرانی عێراق رایگەیاند، لە كۆبوونەوەی لیژنەكەدا خوێندنەوە بۆ ماددەی دووەم و بڕگەكانی كراوە كە تایبەتە بە شێوازی پڕكردنەوەی كورتهێنان و گوێگرتن لەو پێشنیارانەی لەو بارەیەوە لە ئارادایە.
هەر لە كۆبوونەوەكەدا لیژنە دەنگدانی ناوخۆیی لەسەر ماددەكانی (3 و 4) و (12 تا 16) دواخست، لەكاتێكدا دەنگدان لەسەر ماددەكانی (5 تا 11) و (17 و 18) ئەنجامدرا.
دەنگدانی لیژنەكە بە ئامادەكارییەكانی كۆتایی پرۆژەیاساكە دادەنرێت بەر لە گەڕاندنەوەی بۆ سەرۆكایەتیی ئەنجومەنی نوێنەران و دەنگدانی كۆتایی لەسەری لەلایەن پەرلەمانتارانەوە.
چاوەڕوان دەكرێت تا كۆتایی ئەم هەفتەیە یان سەرەتای هەفتەی داهاتوو ئەنجومەنی نوێنەرانی عێراق پرۆسەی دەنگدان لەسەر پرۆژەیاسای بودجە ئەنجامبدات.
