رووداوێكی هاتوچۆ لە شاری هەولێر روویدا و بەهۆیەوە دوو كەس كە برای یەكدین بە سەختی برینداربوون.
بەپێی وتەی فازڵ حاجی وتەبێژی هاتوچۆی هەولێر، رووداوەكە بەیانیی ئەمڕۆ چوارشەممە، لەسەر ئۆڤەر پاسی شەقامی 120 مەتریی رێگای بەحرکە لە هەولێر روویداوە.
راشیگەیاند، ئۆتۆمبێلێكی هیۆندای ئەلنترای تایبەت لە سایدی چوون بۆ ناو شاری هەولێر، بەهۆی تیژڕۆیی کۆنترۆڵی لەدەستداوە و خۆی کێشاوە بە ستوونێکی کارەبادا لە تەنیشتی رێگاكە، دواتر ئۆتۆمبێلەكە چووەتە سایدەکەی تری شەقام و خۆی بە بەربەستە ئاسنینەکاندا داوە.
وتەبێژی هاتوچۆی هەولێر ئاشكرایكردووە، لە ئەنجامی رووداوەکەدا شوفێر و سەرنشینی ئۆتۆمبێلەكە کە برای یەكدین، بە سەختی برینداربوون و رووداوەكە زیانی ماددیی زۆری لێكەوتووەتەوە.
