“منداڵان لەلایەن باندەكانی تاوانی رێكخراوەوە بەكاردەهێنرێن و یاسایەك نییە بیانپارێزێت”، ئەمە هۆشداریدانی لیژنەی ژنان و منداڵانی ئەنجومەنی نوێنەرانی عێراقە.
دوای ئەوەی نەتەوە یەكگرتووەكان مەترسیی راگەیاند بەوەی كە بەرزبوونەوەی رێژەی هەژاری، كاریگەریی لەسەر منداڵانی عێراق هەیە، سوهام موسەوی ئەندامی لیژنەی ژنان و منداڵانی ئەنجومەنی نوێنەران ئاشكرایكرد، “بەهۆی هەژارییەوە منداڵان لە سێ جۆر تاوانكاریدا لەلایەن باندەكانەوە بەكاردەهێنرێن، كە بریتین لە دەرۆزەكاری، بازرگانیكردن بە مرۆڤ و ماددەی هۆشبەرەوە”.
موسەوی جەختدەكاتەوە لەوەی نەبوونی یاسای تایبەت، وایكردووە دامەزراوەكانی پەیوەندیدار بە پاراستنی منداڵ، نەتوانن وەك پێویست پارێزگارییان لێبكەن و دەڵێت، “یاسای پاراستنی منداڵ لە ئەنجومەنی نوێنەران خوێندنەوەی یەكەمیشی بۆ كرابوو، بەڵام بەهۆی ناڕەزایەتیی هەندێك لایەنەوە، پەسەندكردنی هەڵوەشێندرایەوە”.
بەپێی راپۆرتی نەتەوە یەكگرتووەكان، نزیكەی 4.5 كەسی عێراقی لە دۆخی هەژاریدا ژیان دەگوزەرێنن و منداڵان زۆرینەیان پێكدەهێنن.
