بەڕێوەبەری نەخۆشخانەی د.جەمال ئەحمەد رەشیدی منداڵان لە سلێمانی رایگەیاند، ئەو کەسانەی شەوی رابردوو بە چەکەوە هێرشیانکردە سەر کارمەندەکانی نەخۆشخانەکە دەستگیرکراون.
د. پشدەر عەبدوڵا بەڕێوەبەری نەخۆشخانەی د. جەمال ئەحمەد رەشیدی منداڵان بە تۆڕی میدیایی ئێستای راگەیاند، “شەوی رابردوو لە دەوروبەری کاتژمێر 11:00 پیاوێک ویستوویەتی بچێت سەردانی نەخۆشەکەی بکات لە نەخۆشخانەکەمان، بەڵام بەهۆی ئەوەی کاتەکەی درەنگ بووە پاسەوانانی نەخۆشخانەکە رێگەیان پێنەدراوە گرژی لەنێوانیان دروستبووە”.
وتیشی، “هەرچەندە کێشەکە چارەسەرکراوە، بەڵام لە دەوروبەری کاتژمێر 3:00 ی بەرەبەیانی بەکۆمەڵێک کەسی دیکەوە هاتووەتەوە نەخۆشخانەکە و دەستڕێژی گوللەیان کردووە و لە ئەنجامدا دوو کارمەند برینداربوون”.
باسیلەوەشکرد، “برینی یەکێک لە بریندارەکان سەختە، دوای رووداوەکەش ئەو کەسانە دەستگیرکراون”.
